Ś L O N S K I E - B E R A N I E
  
4. Pory Roku - Zima
  
Zimowe uciechy u Bercika

Berci - Zima 2022

Bałwan


Stoji bałwan na zygrodzie
Ani ruszyć sie niy może
Tak go śniegym zafujało
Hut na głowie zapadało.

Mróz przymroziōł go do ziymie
Tera na stojōnczka drzymie
Niy ôtworzy ani ôczy
Bezto sie sztyjc yno boczy.

Że nos ptŏki ôbdziōbały
Tera mŏ go cojś za mały
Ta mietła co mu wrazili
Cŏłko ptŏki ôbsiednyły.

Niy spokoju niy dŏwajom
Yno sztyjc po nim skokajōm
Kiejby se już ôdfurgnyły
Za ziŏrkami kaj skoczyły.
Kjejby pokój mu już dały
Bo ôn przeca zmarzły cały.

Copyright © Urszula Oślislok



Już zima idzie


Mrozik rano nom pomrozioł ,
i ze Zimom se pod rynka chodzioł.
Już śniegu biołego dokoła momy,
czopky i rynkawiczki oblykomy.

Zima z mrozym już tańcuje,
słonko na nich pokukuje.
Coś mu grzoć se dzisiaj nie chce,
dyć bjydne słonko je w kropce.

Zima mu zakozała grzoć
mo do ciepłych krajów gzuć.
Ona z mrozym tu króluje,
a pośwycić yny go potrzebuje.

Coby śnyżno szata ji błyszczała,
kero od mrozu w prezyncie dostała.
Tańczy Zima, śniegym prószy,
a gizd mroz, szczypie w uszy.

Wiater cicho im przygrywo,
abo w gałyńziach schowany drzymo.
Pola, lasy, parki, domy,
przystrojone śniegym momy.

Jakoś ta zima przeżyć musimy,
ale o wiośnie już tyż marzymy.

Copyright © Maria Kostrzewa



ZIMA JAK ZIMA


Stowóm rano - juzaś leci
i mo lecieć do niydzieli!
Nigdy w życiu nasze dzieci
tela śniega niy widzieli.

Przeca pora lot za rajóm
śniega ledwo napruszyło.
Niy dziw, że niy pamiyntajóm,
że inakszy kiedyś było.

Żodyn niy bół tym zdziwióny
jak śniyg leżoł piynć miesiyncy.
Bałwan w grudniu ulepióny
stoł do marca, abo wiyncyj.

Przeca zima mo być zima!
Tak mo być, tak dycki było!
Śniyg mo leżeć i mróz czimać,
by robactwo wyginyło.

Tóż i wajać nad czym niy ma,
dyć niy mómy wpływu na to.
Jak sie skóńczy łostro zima,
przidzie pó nij gorke lato!

Copyright © Bernard Śmigała



Zima zła -łoblykać sie trza


Hu!hu!ha! -na rynce chuchómy!
Hu!hu!ha! -zima wszyndzi mómy!
Hu!hu!ha! -szczypje mróz na dworze!
Hu!hu!ha! -ani czopka niy pomoże!

Hu!hu!ha! -łoblykać sie trza!
Na kark ciepły szal łowijej
Na rynce makówy wdziywej
Wejź se też fusekle sztrykowane
Nogi bydóm bardzi zababulane.

Hu!hu!ha! -łoblykać sie trza!
Nie zapómnij ło spódniokach
Bo niy widać jich w galotach
Kożdo frelka, baba łoblyko spodniczka
Bo mróz niy yno mrozi liczka.

Hu!hu!ha! -łoblykać sie trza!
Mantel s pelcym s szranku bier
Abo kożuch na sia dej
I pamjyntej ło mazidle
Co by mróz niy szczypoł po gymbje.

Hu!hu!ha! -łoblykać sie trza!
Jak sie już tak wyrychtujesz
To se na dwór wylazujesz
Niy straszno ci tera zima
Bydziesz umieć to wytrzymać.

Hu!hu!ha! -łoblykać sie trza!

Copyright © Urszula Oślislok



Zima z wiatrym tańcowali.


Jak zima z wiatrym tańcowali.
A tym dwom rady nie było,
bo tak fajnie se im tańczyło.
Zawioli pola i wszystkie drogi,
zomjynta narobjyli i głośno se śmioli.
Zima piszczała, wiater groł,
a skrzek gawronów w chórze mioł.

Tańcowoł wiater ze śniyżnom zimom
ani moja chałupa tyn gizd nie minoł.
Pogwizdoł mi fest w kominie,
i zasypać plac śniegym kozoł zimie.
Jeszcze lotoł mjyndzy chałupami,
i tak fjuchoł, że aż huśtoł stromami.

Zakłupali mi do okna wiater z zimom,
ale jo z nich wcale strachu ni mom.
W cieple siedza przi oknie z szolkom tyju,
i se prziglondom jak tańcujom,
tym bezkracyjom.

Copyright © Maria Kostrzewa



Zimowe uciechy


Padze śniyżyk padze
A wszyndzi je biołŏ
Wietrzysko se wieje
Drõgi już zawiŏło.

A na kympce dziecka
Na sõnkach sjyżdżajõm
A wielko łuciecha
S tego śniega majõm.

Szkopyrtnõł s sõnkami
Antek ze Zeflikym
Szczas sie s nimi Acik
Zachŏczõł mantlikym.

A na dupolocie
Fest rozfechtowany
Jechŏł chruby Francik
I wpierniczõł na nich.

Kupa sie zrobiła
Dziecka ôbkulane
Dyć jim je wesoło
Niy sõm polõmane.

Tuż dali na kympka
S tym co kiery mŏ
Sõnki, miechy, dupoloty
Potym jazda, że ho ho.

Copyright © Urszula Oślislok



Styknie tyj zimy


Stowóm rano do roboty
myśla, jak sie łoblyc mom.
Czy styknie same galoty
czy spodnioki, niy wiym sóm.

Czy móm wcióngnónć rube zoki
łoblyc jakla sztrikowano
czy szczewiki, czy gumoki
- myśla ło tym cołke rano.

Rano wszysko zamarznióne
mośesz uklojzdnóńć na lodzie.
Potym wszysko roztopióne
i zaś topisz sie we wodzie.

Jak tukej niy dostać rymy
kej tak zmiynio sie pogoda?
Tóż dziyń w dziyń medykujymy
co je gorsze - lód czy woda?

Wszyscy wiosny wyszczygómy
by nóm klara łoświyciła
i do Pónbóczka rzykómy
by ta zima sie skóńczyła.

Copyright © Bernard Śmigała




  
4. Pory Roku - Wiosna

Berci - Wiosna 2022



Pjykno wiosna


Przyszła do nos pjykno Wiosna.
bukiet kwiotków z sobom niosła..
Z kwiotków wionek zdobiył włosy,
poprzetykane kropelkami rosy.

Z leciutkiej mgły szaty miała,
z długim trynym jak królowa paradowała.
Kaj przechodziyła, cuda se dzioły,
trowa sie zieleniyła, kwiotki rozkwitały.

Śpiyw ptoków słychać boło dokoła.
a wiosna roześmiano do życia wszystkich woła.
Choć złośliwa zima mrozym jej dokuczy,
wiosna ze słońcym jom złośliwości oduczy.

Stromy zazieleni, obsypie kwiotkami,
i już słabo zima na dycki wygoni.

Copyright © Maria Kostrzewa



Ptŏszki ćwiyrkajōm


Ptŏszki z rana już ćwiyrkajŏm
A ô wiośnie rosprŏwiajōm
Że już je kajś blisko
Bo tyż słōnko bardzi blyskŏ.

Łod rana nōm przygrzywŏ
A śniega sie już pozbywŏ
Chociŏż taji pomalutku
Wiosna idzie po cichutku.

Dziyń już corŏz długszy je
Noc zajś krōtszŏ robi sie
I słōneczko bardzi świyci
Chneda bydzie rosło kwiyci.

Copyright © Urszula Oślislok



Toż to już wiosna


Somsiod pado, że już wiosna,
łon to w lufcie czuje
a mje dali łomie w kościach
cosik mi tu niy pasuje.

Bo jo w szłapach mom baromet,
łon mi dycko godo,
pogoda sie bydzie miynić
bo ciśniynie spado.

A bez jesiyń uślimtano
to jednako gnaty bolom,
bo niy ciyrpiom płaczków z nieba
już ci słonko lepi wolom.

Toż jak idzie ciepło wiosna
to raduja sie łokropnie
w lufcie wonio, kwiotki kwitnom
ptoszki świyrgolom sromotnie.

A tak to powiym po cichu
wiosna to je dobro sprawa,
skuli ciepła i słoneczka
łomać w kościach niy mo prawa.

Copyright © Regina Soblik



Berci - Wiosna 2022



Wiosynne słonko


Kej słonko już przygrzywo,
to kożdymu serce śpjywo.
Jedyn auto już pucuje,
drugi koło se sprawuje.

Ale najfajniejszy wic,
że jo niy szykuja nic.
Bo jo niy społa bez ta zima,
lyniym to jo przeca nima.

Co zepsute toch sprawjyła,
koło dziynnie przeglondoła.
Dzisiej za to se raduja,
na odpoczynek se sztartuja.

Kej se jada z domu drogom,
widza jak chłopy kole aut locom.
A niech wszystko posprawiajom,
krziwym okym niy zaglondajom.

Bo przy tymu nic nie tracom,
a kondycja se wyrobiom.
Kiedy słonko fajnie świyci,
na odpoczynku dziyń mi zleci.

Bo jo nie społa bez ta zima,
jo kondycja dycko trzimja.
Ale najfajniejszy to je wic,
że jo nie musza dzisiej robić nic.

Copyright © Maria Kostrzewa



Wjosynka Paniczka


Wiosynko ty moja
Cojś ty za paniczka
Szatki mŏsz zielone
Przy szatkach kaniczka.

Włosy złote rozczepane
Jako słōnko rozblyskane
Na głowie winiuszek
Z rozmańtych kwiatuszek.

Rynce cŏłki ôplecione
Wszyski kwiŏtki tam wrażōne
A szłapeczki bose
Co depcōm po rosie.

Ale kaj żejś sie zawieruszyła
Żejś sam do nŏs niy przybyła
Kaj żejś sie to zajś smykała
Słōnka żejś nŏm sam niy dała.

Niy kwiŏteczka niy listeczka
Ani śpiywu skowrōneczka......

Copyright © Urszula Oślislok




  
4. Pory Roku - Jesiyń

Jesiynnŏ paniczka

Jesiynnŏ paniczka


Dorodnŏ paniczka już zawitała
Z jarzymbiny załośniczki miała
Szaty liściami sie miyniły
Rozmaite farby na nich były.

Brōnŏtny a złoty,najwiyncyj tego
Niy brakuje tyż czerwonego
Na karku pōciorki z dybiōnek
A z kasztanōw mŏ pieszczōnek

Na głowie liściaty winiec, kwŏtki wpiynte
Astry i dōmbki z zegrōdki wziynte
Słōmioki jeszcze do włosōw dała
Co by tak piyknŏ nas przywitała.

Idzie po świecie wszyndzi zaglōndŏ
Kaj niy ôżdżelało to słōnko ściōngŏ
Co by ôzłocić kŏżdo gruszka
Co by ôżdżelały jabuszka.

Ale niy jyno słōnko nōm dŏwŏ
Czasym sie z nami tyż a pogrowŏ
Puści nōm zima a deszcz tyż leje
A ôna wichrym po dworze wieje.

Przeca to JESIYŃ ! - zmiynnŏ paniczka !
Czy idzie przy niy wygrzywać liczka !?
Do ci pozbiyrać to co urosło
Potym grzyj sie przy piecu a doma ôstōń.

Copyright © Urszula Oślislok




Kartoflisko

Kartoflisko


Jesiyń przyszła z dyszczym w porze,
słonko za chmurami, straciyli po drodze.
Na polach kartofle już ostatni kopali,
kożdy se uwijoł kopać, bo czas leci dali.

A na kartofliskach coś se rychtuje,
i już kurz z fojerek, nad polami tańcuje.
Gromadka dzieci nać na fojerki już snosi,
woń pieczonych kartofli, dokoła sie unosi.

Wiater tańcowoł z kurzym, i w lewo i w prawo,
uradowano gromadka, leci ku fojyrce żwawo.
Wygrzebujom patykami kartofle, eli już upieczone,
i jedzom ze szmakym, choć niykere som przypolone.

Fojerki se dopolajom, kurzom trocha jeszcze,
wszyscy idom dodom, Jesiyń kropi dyszczym.
Zatańcowała z wiatrym, dyszcz ze sobom przitargała,
by se ciuchy niy stoplać dali z wiatrym odfurgała.

A dyszcz padoł, moczoł wodom wszystko,
domy, lasy, łonki, pola no i kartoflisko.
Słonko zza chmur woło do zmierzłego dyszczu,
kończ padać, ziymia trzeba rychtować do siywu.

Jesiynne roboty pełnom parom idom,
uwiajajom se gospodorze niż mroźne dni przidom.

Copyright © Maria Kostrzewa (B)



Jesiynno robota

Jesiynnŏ robota


Pusto robi sie na polach
Gospodarz łorze swoja rola
Kopióm już zimnioki
Zbiyrajóm i male pómperloki.

Kaj pojrzysz robota wre
Bo to jesiyń przeca je
S pola wszystko trza pochować
Co by potym przezimować.

Do dobytku i do ludzi
Do piwnice trza to skludzić
Jeszcze ćwikla połokrować
Wiyrcha na płot poukłodać

Cołki grincojg ze kapustóm
Bo beczka je jeszcze pusto
Pokrónzać to i łudeptać
A potym se kwaska szłeptać.

Fol roboty przy jesiyni
Bo tyn czas sie nom sztyjc miyni
Trza sie śpiychać niż mróz przidzie
Co s pola skludzone wszystko bydzie.

Copyright © Urszula Oślislok



Idzie Jesiyń - Jesiynne Liście

Idzie Jesiyń


Deptom sie tak poleku ściyżkami,
a liście szuszczom fest pod nogami.
No tak łoblatujom sie z kuli jesiyni,
bo łobroz w kółko pryndko sie miyni.
Liście zielone, żółte i fajne czyrwone,
a asty drzew som coroz barzi łogolone.
tak ida i myśla sie choć wiater wieje,
czy aby zima sie już do nos niy śmieje.
Ale my na to nic a nic niy poradzymy,
bo kedy zima przydzie to sie dowiymy.

Copyright © S. Sych



Jesiynno pioska

Jesiynnŏ pioska


Jesiynnŏ pioska wiater śpiywŏ
Dmuchŏ po polach, liści przybywŏ
Trocha przysiednōł se we zygrōdce
Kaj kwitnōm kwiŏtki na grzōndce.

Tam szmaterloki szumnie furgajōm
A piyknie ptŏszki jeszcze śpiywajōm
Brzynczyni pszczoły słyszeć we kwiŏtkach
Kiere w jesiennych siedzōm siyrotkach.

Podmuchŏł wiater se na kwiŏteczki
Potym na strōmach zerwŏł listeczki
Kiere we lufcie piyknie furgały
Aż se na trŏwa poślatowały.

Tańcowŏł trocha we brzimōw astach
Poleciŏł dali bez wieś do miasta
Po parkach loce i tam rajcuje
Ze strōmów liście na ziym ściepuje.

Copyright © Urszula Oślislok



Jesiynno Kawa

Jesienno kawa


Jesiyń terozki już na dworze panuje
w ciepłyj hałpie kożdy dobrze sie czuje.
U Bercika leci z rana fajnisto muzyka
a kawa kusi mie zapachym do wypicia.

Poranno mgła zza łokna sie pomalu unosi
by wylyź na dwór, -pogoda sie aż prosi.
Kożdo pora roku mo przeca uroki swoje
a piykne kolory radujom ślypka moje.

Mrozik na dworze drzewa już maluje
wiater psotnik se fajnie pogwizduje.
Kolorowe liście świrujom pod nogami
a wiaterek śpiywo miyndzy drzewami.

Kej na dworze jesiynne dni królujom
Berciki nojlepi przy kawie sie czujom.
Jak w tyn bajkowy świat wylyź chcymy
to sie przeca festy łogacić musimy.

Za łoknym zaś chmury niebo zakrywajom
łostonń w haupie tak ci sam godajom.
Ale jak yno zaś bydzie piykno pogoda
nic nos niy utrzimie, -i zaś w droga.

Copyright © Maria Kostrzewa (B)



DRACHY

DRACHY


Ftoś pamiynto tamte czasy
jak furgały w lufcie drachy.
Skromne małe papiorowe
wszystkie gryfne kolorowe.
Zrobić trza go boło samymu
i pokwolić sie niym drugymu.
Tam kaj drachy sie puszczało
niykej sznorkami sie motlało.
Wiela szpasu przi tym boło
ale nigdy sie nom niy nudzioło.

Copyright © S. Sych





Berci - Szolka 2022

Bōn-Kawa


Bōnkaweczko moja
dyć jŏ ô cia stoja
kjej cie niy wypija
to ôspale żyja.

Pija cie już s rana
ledwo s łōżka stana
pija i w połednie
nim sie ôbjŏd wetnie.

Pija na wysiadach
fest żech s tego rada
i we wjeczōr pija
niy byda cie mijać.

Cŏłki dziōnek s kawōm mōm
ze skōrzycōm pija jōm.

Copyright © Urszula Oślislok


 
KULTURVEREINIGUNG BERCIK - SILESIA

ŚLONSKO GODKA


Ślonsko godko, keroś wieki nom przetrwala,
my sie ło cia staromy, co byś zowdy sam łostała.
Tys mie, jak żech na Boży świat prziszoł, prziwitała,
jo tobom byda godoł, to mi do kolybki matka dała.

Już starzyki, Fater i Muter tobom godali,
jak jeszcze sam inksi na Ślonsku panowali.
Terozki nowe, inksze moderne czasy momy,
ale o ciebje zapomnieć nigdy, ale to nigdy niy domy.

Ślonsko godko, tyś nom sam do dzisioj przetwała,
żodno zawjerucha cie nom z serca niy wyrwała.
My bydymy sie dalyj ło cia zowdy festy starali,
by cie tyż inksi poznali, -i tobom tak jak my godali.

Pójdymy z tobom daleko w inksze nieznane kraje,
niych poznajom nasze dzieje i swojskie łobycaje.
Wszyndzie tam kaj Ślonzoki na swiecie mjyskajom,
tyj nasyj kochanyj godce już dzisioj festy pszajom.

Możno cie kjeś we szkołach bydom nasze wnuki miały,
by nastympne pokolynia cie nigdy niy zapomniały.
My sie już terozki we urzyndach ło cia mocka staromy,
zapomnieć cie nigdy, tak jak my sam som, -niy domy.

Copyright © RBS & KVBS (Berni)




My Ślonzoki po ślonsku godomy,
bo przeca swoja ślonsko godka momy.

Cy to sie komu podobo cy tys niy,
tego nom żodyn niy zabroni, niech kożdy to wiy.
Tyla na nasym Śląsku nom jesce łostało,
że po ślonsku pogodać mogymy sie śmiało.

Som tacy, co by nom zabronić tego chcieli,
yno jednego w swym myślyniu niy przewidzieli:
Że ślonzoki niy ułomki, mocno Ślonsku przajom,
a do ślosnkyj godki srogi syntyment tyż majom,

Ślonsku nasz Ślonsku, tyla złego Ci jus wyrzondziyli,
oszukali Cie, i rozgrzebany bez roboty Cie łostawiyli.
My na Ślonsku tak dugo po ślonsku berać bydymy,
dopóki na drugym świecie sie niy znojdymy.

Tam dali berac bydymy, jak my na ziymi berali,
bo my sie na Śląsku urodziyli i tyż wychowali.
Z Pon-Bockym tyż po ślonsku sie poklachomy,
bo łon dobrze wiy jak my mu na Ślonsku przajomy.

Niy bydzie mioł nic przeciwko beraniu naszymu,
a za to, że po ślonsku godomy, pobłogosławi kożdymu.

Copyright © Stefan z Wiesbaden


 
KULTURVEREINIGUNG BERCIK - SILESIA

Dziyń Ślōnskij Gŏdki


My na Ślōnsku sam miyszkōmy
Nasza gŏdka w zocy mōmy
I se jōm fest szanujymy
Młodym przekazować bydymy.

Co by młodzi pamiyntali
Jak starziki jich gŏdali
Co by jeji pszocielami byli
Nigdy naszej gŏdki niy zatracili.

Bo sam na tyj ziymi mama nŏs uczyła
Jak naszej gŏdce pszoć
Trza godać po naszymu
Niy ma sie czego bŏć.

Copyright © Urszula Oślislok



Gŏdōmy po ślōnsku


My po ślōnsku se gŏdōmy
Bo przeca tukej miyszkōmy
Tukej my se urodzili
Tukej chałpy postawili.

Sōm sam nasze familije
Dobrze nōm sie tukej żyje
Chociŏż jedni wyjechali
Zaglōndajōm tukej dali.

Bo po ślōnsku sztyjc gŏdajōm
Nasza gŏdka w zocy majōm
My se jōm tyż szanujymy
Młodym przekazować bydymy.

Co by młodzi pamiyntali
Jak starzyki jich gŏdali
Co by jeji pszocielami byli
Nigdy naszej gŏdki niy zatracili.

Copyright © Urszula Oślislok



Moji gŏdce


Gŏdko ślōnsko, gŏdko miła
Coś przez wieki sie rodziła
Jŏ tobōm byda gŏdała
Nigdy ô cia niy zapomniałach.

Już starzyki niōm gŏdały
Wtedy kjej krōle panowały
A do dzisiŏj tyś przetwała
Żŏdnŏ zawierucha cie niy zdeptała.

Tera nowe czasy mōmy
Ô ciebie zapōmnieć niy dōmy !
Bydymy ô cia sie starali
By cie inksi tyż poznali.

Nasze dzieje, ôbyczaje
Idōm s tobōm w inksze kraje
Tam Ślōnzŏki tyż miyszkajōm
Naszej gŏdce fest pszajōm.

Ksiōnżki tobōm już pisane
A s łuciechōm sōm czytane
My sie tera już niy dōmy !
W łurzyndach ô cia sie starōmy.

By nasze dziatki cie niy zapōmniały
Mono kjeś w szkołach bydōm ciebie miały
Gŏdko ślōnsko, gŏdko miła !
Byś sie nigdy niy straciła !

Copyright © Urszula Oślislok



Gŏdka


Ta nasza gŏdka
rwie sie do przodka
My niōm gŏdōmy
we świat puszczōmy
DYĆ PORADZYMY!
wszyjscy to wiymy
Ta nasza gŏdka
kierej pszajymy
na zatracyni
niy pozwolymy!

Copyright © Urszula Oślislok



COWID i POGODA



COWID i POGODA


Trzech króli jusz my mieli
Śwjynta jusz nom tysz minyli
Na dworze dyszcz ze śniegym kipie
Smutno teroz siedzieć w chałupie.

Trocha śniegu i mokro momy
To z chałupy niy wylazujymy
Przeżyć w zdrowju to je szczyściy
Do dwjyrzy jusz Cowid klupie wszyndy.

Teraz kożdy boji se wirusa
Z chałupy żodyn jusz se niy ruszo
Żodyn do ciebie niy pszidzie bo se boji
A moja szolka z kafejym od godziny stoji.

Kawa dzisiej mi niy szmakuje
Jakoś mi tego słońca brakuje
Roztomańte myśli locom mi po głowje
Kaj je to słońce kiery mi to powjy.

I nadzieja wy mie drzymie
Że Cowid niy zaklupie do mie
Na dworze dyszcz ze śniegym leci
Niech jusz ta pogoda se zmjyni
Bo jusz cało pogłupjała
Czy i ona, -by jusz Cowida mjała?

Copyright © Maria Kostrzewa

A morał z tyj geszichty je taki:
Starka, Starzik -łostońta w doma
a jak ześta som już na penzyji,
poczkejcie aż sie to wszystko zmiyni.
Jak wom sie miyrznie i je wom źle,
posuchejcie se Radio Bercik - Silesia
a wszystko na dobre zmiyni se...


 
KULTURVEREINIGUNG BERCIK - SILESIA

BERCIKOWY HAJMAT


Kajś cie za chlebym poniosło w dalekie światy,
a w sercu łostala rodzina i ślonskie hajmaty.
Tynskonota za domem dowo ci sie w znak,
znajomych i bliskich brakuje ci festy tak.

Ale je dlo wos coś tak fajnego na tym Bożym świecie,
to jest nase “Radio Bercik - Silesia“ we internecie.
My som ślonsko rodzinka - byśta wiedzieli,
gromy fajne spiywki łod poniedziałku do niedzieli.

Cy w doma na Ślonsku abo ze świata całego,
suchomy dziynnie nutki z radyjoka tego.
Cy przy sniodaniu, popołedniu abo i we nocy,
w radości i troskach zawse udzielomy pomocy.

U nos moges pozdrowić twoja i moja rodzina,
wszystkich znajomych i swoja dziewcyna.
Pozdrów tyż piyknie swoja somsiadka,
a upiece na wiecór ci jakoś smacno babka.

A jak ftoś niy wiy kej to bydymy grali,
to my to sam dlo wos na ramówce napisali.
Sam kaj wszyscy fajno muzyka grajom,
i wszyscy sie festy, ale to festy przajom.

I tak Bercika na bezdziyń durch dalyj suchomy,
i z chynciom sam kożdego dzionka zawse wrocomy.
Cas z wami spyndzony, tego je nom durch za mało,
by sie te nase życie dalej tak fajnie jak dzisioj kulało.

Copyright © RBS & KVBS (Berni)



LIST DO MAMY


"Mamulko", czymu ześ nom to zrobioła,
poczymu ześ nos tak łoroz opuścioła?
Je ci tero dobrze? tak do samyj siebie?
Powiydz, jak momy tu żyć bez Ciebie?

Tyś Mamo w nocy utulala nos do snu,
nad naszom kolybkom stołaś zowdy tu.
Tyś nad nami czuwała jak Anioł Stróż,
a my niy momy do cia ani bukietu róż.

Kej nom tu, u Bercika smutno jest i źle,
mrużymy ślypka i widzimy Cie we śnie.
Że choć trocha przajesz, -to my wiymy,
my Ciebie przeca nigdy niy zapomnimy.

Tyś nom piyrwse łociyrała gorzkie łzy,
dej, by dobre zaś boły w nocy nasze sny.
Ciynżke jest dlo nos z Tobom rozstanie,
podej rynka, niych nom miłość tu nastanie.

"Mamo", dej nom choć mały znak od siebie,
wróć, -my czekomy już downo na ciebie.
Niych zaś w sercu radość i zgoda gości,
przeca niy mosz serca z kamyinia i złości.

Tyś nos w życiu walczyć i kochać naumiała,
choć ześ sama z nami niy lekke życie miała.
Wiymy "Mamo", że zadowomy ciynżke pytania,
czy to już czas naszego na zowdy jest rozstania?

Przypomnij sie coś nom przy chrzcie obiecała.
niy pol mostów, -tyś nom swe życie darowała,
Wiymy, że wontpliwości niy bydom rozwionzane,
ale czy łostaną Ci w sercu, -twe dzieci kochane?

Copyright © RBS & KVBS (Berni)



U BERCIKA GRO MUZYKA


Kajś daleko, tam u Bercika,
tam kaj to nojlepszo gro muzyka,
jest tako kraina, to chyba wiycie,
tam som wszyscy we inkszym świecie.
Świat muzyczny z roztomajtnymi kolorami,
wito nos wszyskich zowdy ze uśmiychami.

Jak ześ som, -i jak je Ci festy źle,
włonc Radyjko i wszystko łoroz zmiyni sie!
Sam naszo rodzinka czeko na cia kożdy dziyn,
i wszystkie smutki odchodzom gibko w ciyn!
Bez muzyki, -je ci źle, -to wiedzom modzi i starzy,
zaproszomy Wos, niych kożdy se na chmurce pomarzy!

My sam razym z wami Bercikami, -na zowdy łostaniymy,
dyć my sie to wszyscy, festy -ale to festy pszajymy!
Co za szczyńście, że znodli my te Radyjko we Necie,
drugygo takygo, niy znojdziecie na cołkim świecie!

Copyright © RBS & KVBS (Berni)



FUSSBALL BERCI - LIGA


Downo Liga grajoncych, -my poskłodali,
frelki, karluse, tak my sie sam dopasowali.
Gromy łod lot, dlo wos, -na cołkim świecie,
a jak gromy, tego suchocie, -we internecie.

Dobry Start, z Bercikowom załogom my mieli,
tak Spiele boły, łod poniedziałku do niydzieli.
Rostomajtnie to sam u nos -niyroz tyż bywało,
roz cołykm na dole, to zaś spiel sie wygrywało.

Porzondek sie noleży, załoga w rynkach trenera,
łon downo sie wybroł, co niy jednego sam lidera.
Technika opanowano, jedni kalycom, inksi fajnie grajom,
jedne sie spórkujom, ale som i te -co szczynście majom.

Na tym spiel - placu, niy roz my sie, -tyż pokjołlzdali,
nigdy my sie niy poddali, yno ciyngym, -dali, -grali.
Czasami tyż zawodników, sie sam u nos, -wymienioło,
trenera marzynie, i naszych Bercików, -sie zaś spełnioło.

Te co z boku stojom, -ciyngym sam coś dopingujom,
nadzieja że wygromy, -takie ciche marzynia tyż snujom.
Som tyż take łobskuryje, kere tego Bala som zazdrosne,
sami niy poradzom, żałować ich, bo życie majom żałosne.

Że drugo Liga, jedyn sie uśmiycho, -a drugi sie zaś smuci,
yno że to, co w życiu minoło, -niestety już nigdy niy wróci.
Trenera zaś jego zadanie, -porzondek sam u nos utrzimać,
niy trza nom nowych, -momy załoga i tak dali trzimać.

Copyright © RBS & KVBS (Berni)



RADIO BERCIK


Radio Bercik zowdy piyknie gro,
fto mu przaje tyn go zno.
Czas nom sam tyż gibko leci,
rodzina, to niy som yno dzieci.

Jak w tym jednym familoku,
siedzimy se na drabinioku.
Wice, bery łozprawiomy,
i sie przy tym tyż chichromy.

Karluse - Frelki podpuscajom,
downe czasy wspominajom.
Cosig naskryflomy, gupoty pofulomy,
fajnych śpiywek ku tymu posuchomy.

Spomnij o tyj godce, o zwyczajach,
niy zapomnij o fajerach i o chajach.
Jak to na Ślonsku sie wszyscy festy pszoli,
my beromy i łospawiomy, fto co yno woli.

Tak sam siedzom starka, siedzi starzyk,
żodyn z nich niy zaglondo na zygaryk.
O downych czasach mocka pogwarzymy,
i na wieki sam z wami łostaniymy.

Copyright © RBS & KVBS (Berni)



ODA DO ROBOTY


Tyś jest u Ślónzoków dycki w wielkij zocy!
Dbómy, cobyś była - przi Bożyj pomocy -
choć tak ciynżko jak nikaj -porzóndnie zrobiono
i byś dycki była godnie zapłacóno!

Co do tyj zapłaty - niy zowdy tak boło,
przeca, fto cie posiod, niyźle mu sie żoło.
Wielaś jest we wercie -sama żeś wiedziała,
dbałaś o swo woga i sie szanowałaś!

A potym czas prziszoł, żeś woga straciyła,
spowszedniałaś, zlichłaś jak "zjechano" kobyła.
Brali cie, boś była! Chcieli czy niy chcieli!
Żodyn niy szanowoł, bo wszyscy cie mieli!

"Czy sie stoi, czy leży..." -tak wtedy godali
i, miast robić, że robióm ino udowali!
Dziepiyro terozki, jak cie zaś brakuje,
nazot nómy cie w zocy i kożdy szanuje!

No -możno niy kożdy, dyć niyjedyn sie asi,
że sie tobóm nigdy rónk niy pomarasi!
Jo tam niy żałuja takich niyroboli!
niych grzebióm w hasiokach i niych śpióm na zoli!

Żol mi tych, co skiż zdrowio, abo skiż wypadku,
cie straciyli i teroz żyjóm w niydostadku!
Tóż mógła byś nikej ściepnóńć trocha z wogi
i pómóc tym ludziom, by wstali na nogi!
Godajóm, że niy ma kołocza bez ciebie.
Wierza, że nóm niy dosz żyć ło suchym chlebie.

Copyright © Bernard Śmigała



        22.12.2012 Hura wir leben noch...

Das Jahr 2012, - schreibt das weite Universum,
unendliches und unerforschtes weites Spektrum.
Es ist der Tag, - der Tag nach dem Tag (X),
Ruhe, - Stille, - ein grenzenloses - NIX.

Es scheint parallele Welten zu geben,
i denen sich nicht alle gleich bewegen.
Die Hindernisse werden mal überwunden,
alle Sorgen sind irgendwann verschwunden.

Immer noch warten die Geschöpfe auf ein Wunder,
hoffen, so Tag-täglich - sonnst geh'n Sie unter.
So öffne dich den Menschen, einen kleinen Spalt
- du wirst seh'n, es lässt nicht jeden, gleich kalt.

Wirklich, - es hat sich doch gelohnt so lange zu Leben,
um die Menschlichen Schwächen auch noch zu erleben.
Diese Unzulänglichkeiten gibt es täglich doch zu Hauff,
egal, was soll's, -ich sag’s Bercik -Lauf, - weiter Lauf.

Nicht verzagen, - Berni fragen, - sagt der Kapitän,
Antworten, hmm, - nicht auf alles, - aber mal seh'n.
Herzlichen Gruß aus dem alten Raumschiff - Ber-Sil,
welches durchdringt die Berci - Galaxy, - ganz still...

© Copyright 22.12.2012 RBS & KVBS (Berni)



Berci Kret - 2014

Kret, komiczne to stworzynie,
panosy sie na Bercika Antynie.
Hołdy we zogródce nakopane,
take Kreta życie je mu dane.

Pod ziymiom sie kajś kryje,
po cichu gonki i tunele ryje.
Podbiyro nos, kaj sie yno do,
bo jakeś wonty, do nos mo.

Pod ochronom krety momy,
ale szkodzić mu niy domy.
Wytympimy te “maniyry“,
aż padnie na swoje “cztyry“.

Podbiyracza pozbyndymy,
a jego tunele zadepcymy.
Kretowina gibko wyrównomy,
i fulać mu sam tyż niy domy.

Przegonimy go na inksze pole,
tam niych robi swe swawole.
Ryj i kopej, -wiela yno chces,
my wachujymy, -choby pies.

Na darmo ci szkody staranie,
zaś spokój na łonce nastanie,
Niy znerwujes żodnego z nos,
ślepym łostać, -to je twój los.

Copyright © RBS & KVBS (Berni)



Berci Kret - 2014


     

P R O M U S  - Sprzedaż płyt

P.P.H.U. ESKA Sp. z o.o.  - Sprzedaż płyt

Na tej stronie znajdziecie obecne i archiwalne informacje

Poszukujymy sponzorów
kerzy nas zwionzek
© Kulturvereinigung
Bercik - Silesia e.V.
zechcom wesprzeć.
 
Wszystkich chyntnych
serdecznie zaproszomy do
skontaktowania sie z nami.

intendant@radiobercik.eu

  Radio z Licencją
  GEMA  &   GVL